السلام عليكم ورحمه الله وبركاته.
نبدأ علي بركه الله.
موضوعنا عن سمكه 🐳🐳جميله جدا جدا ذات شهره عالميه
وألوان متعدد ونقشات مختلفه وطابع خاص بكل سمكه .
من اقوي الهجائن بالعالم الحديث والعصر الحالي.
تمتاز بالقوه والشراسه والثقه متسامحه مع أخطاء الهاوي .
ومحببه جدا الي قلبي وتعتبر من الأسماك الذكيه جدا حيث تتفاعل مع البشر بكل سهوله وحب ❤❤
( السفينه الحربيه_ فلاور هورن )
اولا .
ظهرت سمكه الفلاورهورن لأول مره في ماليزيا ثم تايلند ثم تايوان .
وقد لاقت شعبيه كبيره جدا بين الهواه والمربين وتغلبت علي نظرائها من الأسماك الاسيويه.
هنتكلم عن متطلبات السمكه من .
1 .حجم الحوض وأبعاده وانسب حجم.
2. جوده المياه ودرجات الحراره المناسبه.
3.انتقاء الأسماك ذات مواصفات جيده .
4.اختيار الأصول المناسبه للتفريخ.
5.التغذيه المناسبه للأصول المعده للتفريخ .
6.مكونات التغذيه الخاصه بتلوين الفلاور.
7.الامراض المنتشره وطريقه علاجها.
8.التفريخ وطريقه الاهتمام بالبيض.
9.كيفيه فرز الزريعه وانتقاء المواصفات القويه من الصغر.
(حجم الحوض وأبعاده )
اسماك الفلاور من الأسماك التي تحتاج حيز مائي كبير بسبب سرعه نموها وكل ما تكبر المساحه كل ما تتعدد الفوائد .🖒
1. ستلاحظ نمو سريع و.حيويه ونشاط .
2. ظهور الألوان بشكل دائم.و ارتفاع الهيد.
3. استقرار الحاله النفسيه للسمكه واستعدادها للتفريخ.
4.قله الأمراض. وسرعه الاستجابه للشفاء في حاله العلاج من أي مرض.
5. استقرار الدوره البيولوجية للمياه بسبب اتساع الحيز المائي ويصبح أقل عرضه للارتفاع السموم والانهيار.
6.الحفاظ علي درجات الحراره من التغير لانها هتقل ببطء شديد.
حجم الحوض المناسب لسمكه واحده يجب الا يقل عن ٨٠×٣٠×٤٠سم وذلك لذكر واحد بالغ بمقاس من ١٥ ل٢٠سم اما لو أردت أن تضع انثي او ذكر آخر في نفس الحوض سيكون الحجم ١٠٠×٤٠×٤٠سم مع وجود فاصل بينهم .
لذلك يفضل تبداء بحوض كبير من البدايه لأن اسماك الفلاور سريعه النمو .
(جوده المياه ودرجات الحراره المناسبه )
تعيش اسماك الفلاور بمياه متعادله نسبيا ولكنه متسامح في درجه ph
٦.٥_٨ ومن الضروري إمداد الحوض بمصدر فلتره قوي جدا يستطيع مقاومه ارتفاع الامونيا والنيتريت.🖒
تحتاج اسماك الفلاور لرعايه خاصه باحواضها ويجب الحفاظ علي المياه نقيه جدا لتلاشي الاصابه بالأمراض المعوية والبكتريا والطفيليلت .🖒
والحفاظ علي تجديد المياه بشكل دائم من مياه مركونه لمده يوم علي الاقل واضافه مصدر أكسجين ومصدر تقليب جيد كفلتر باور هيد وهوه يساعد علي تقليب المياه بأستمرار والتخلص من الكلور بشكل سريع.
اما بالنسبه لدرجات الحراره يتحمل الفلاور هورن دجات الحراره العاليه 🤔🤔ولاكن يجب أن لا تزيد ٢٨ درجه مئوية وهيه الانسب لا أكثر وفي حالات المرض نقوم برفعها حتي ال ٣٠ او ٣٢درجه لسرعه الاستجابة للعلاج وأكثر من ذلك يؤدي لنقص الأكسجين المذاب في الماء وتدمير الدوره البيولوجية وحدوث انفجار بيكتيري وبالتالي اجهاد السمكه وانهيارالمناعه.😫😫
(انتقاء الاسماك ذات مواصفات جيده)
اصبح من السهل انتقاء سمكه الفلاور لوجود مستويات قويه من الفلاور المستورد بمصر🇪🇬 ويمكنك الاختيارعلي حسب رغبتك من ناحيه الشكل والسعر وعلي حسب الإمكانيات المتاحه .
اما بالنسبه للمواصفات يجب توافر الآتي.
1.ان يكون الجسم سليم و متناسق خالي من أي عيوب او جروح او اعاقات.
2.ظهور الألوان بشكل متناسق وجذاب .
3.تناسق الهيد أعلي الرأس مع استداره كامله من كل الجوانب علي شكل كرة بنج بونج.
4 . وجود البيرل او نقشه عشوائيه علي كامل الجسم والهيد.
5.وجود line بلون غامق وكامل بطول الجسم وغير متقطع.
6.كل مايزيد البيرل في الجسم والزعانف والديل كان افضل.
7.يجب أن يكون الفك العلوي والسفلي علي استقامة واحده .
8.بروز اسفل منطقه الرأس بما يسمي اللغد.
9. يكون الشكل العام متناسق ويسر الناظرين.
10.وطبعا القاعده الثابته وهيه الصحه العامه للسمكه يجب التأكد من صحه السمكه جيدا قبل الشراء وان تكون السمك بكامل نشاطها وحيويه في الحوض 😩😩
(اختيار الاصول المناسبه للتفريخ)
دي بقي محتاجه فن وجهد ووقت طويل علشان توصل في الآخر لنتيجه مرضيه .😍
مشكله المفرخ المصري أنه بيحب التجويد ولازم يحط التاتش بتاعه الا مجموعه قليله من المفرخين المحترفين والاساتذه اللي اتعلمنا منهم واستفدنا من خبراتهم.🖒
سمكه الفلاور سمكه بتفرخ علي نفسها يعني تجيب دكر فلاور وتجيب نتايه أي حاجه زي الفيجا او الميداس اوالريد ديفل او الباروت معندهوش مشكله يفرخ معاها والناس تفرح بالزريعه وفي الآخر تطلع الوان البلطي اجمل منها تحس انك فرخت أشباح مجهوله المصدر والتصنيف. 😱😱
لازم قبل ماتفكر تفرخ أي نوع سمك تفهم أصول الجينات وتوافق الألوان والنوع والبعد عن تهجين أنواع مختلفه بغير علم ودرايه جيده بأصل النوع المراد تهجينه بنوع آخر او لون مختلف.🤔🤔
يعني مثلا.
هفرخ ذكر فايتر هاف مون يبقي لازم تكون النتايه هاف مون مش عاده او كراون.
هفرخ دكر جرامي جولدن يبقي النتايه كمان جولدن مش بلو او اوبالين.
علشان تقدر تحافظ علي الصفات الاساسيه لكل نوع وتقدر تثبت الصفات الجيدة وتستبعد الصفات الغير مرغوبه.
طيب دا ايه علاقته بالفلاور ؟🤔
اقولك.
علشان اقدر افرخ فلاور مستوي محترم لازم افهم كويس اصل السمكه ايه واحنا عارفين طبعا انها هجين وان الهجين ده اكتسب الصفات دي وتم تثبيتها ودخول النوع ده مع أي نوع تاني هيخلق أنواع اخري غير متناسقه .😩
الانثي اهم من الذكر وحط تحت اهم دي100 خط.
. الغلطه اللي ناس كتير بتقع فيها بتجيب دكرجامد والنتايه أي كلام وبعد متفرخ تفاجئ ان الإنتاج ملوش أي لازمه.
يعني لوعندك.
دكر قوي +نتايه ضعيفه=انتاج ضعيف وألوان أي كلام
دكر متوسط+نتايه قويه=٧٥%ناتج قوي
دكر قوي +أنثي قويه=٩٩%ناتج قوي حامل لمواصفات الأبوين.💪💪
يفضل عند اختيار الاصول للتفريخ
تزاوج ذكر لانثي من نفس الدم
يعني أب+لبنته او أخ +لأخته
وبعد كدا تنتخب من الزريعه ذكور واناث وتزوجهم لبعض تاني لتسبيت الصفات الوراثيه الجيدة والقويه .
(التغذيه المناسبه للأصول المعده للتفريخ)
تغذيه الاصول تختلف عن التسمين يعني بهتم بيها شويه اكتر لاحتايجهم لكثير من الغذاء الصحي والأمن ولتجنب أصابه الاصول بأي أمراض قد تؤدي لاقدر الله للوفاه وبالتالي اخسر قطعه مميزه من أصولي .😭😭
البرنامج الغذائي ده غالي وموكلف شويه بس ليه فايده كبيره جدا.
علي مدار الاسبوع.
يجب أن تحصل الأسماك علي تنوع كافي بشكل مستمر وعدم الثبات علي نوع غذاء واحد ويجب الاعتماد علي الاغذيه الفرش والغير مجمده .
كا الآتي.
1.قلب بقري بلدي وغير مجمد لاحتوائه علي فوائد اعلي من المجمد بكثير.
2.قلوب الفراخ بعد ازاله الدهون العالقه بها.
3.الجمبري البرغوت اوالعقر البلدي بعد غسله وتقشيره.
4.قطع من السبيط او الكليماري بلدي وفريش.
5.قطع من السمك الفليه اوالتونه البلدي.
6.نوع جيد من أعلاف الفلاور المستورد.
٧.اليوم السابع تصوم الأسماك يوم وتضيف قرص فلاجيل ٥٠٠ ودا بيساعد السمكه أنها تنضف المعده من أي ميكروب او بواقي اكل في المعده بسبب التغذيه الثقيلة.
دا البرنامج الغذائي علي مدار ٧ أيام.
ويمنع اضافه أي معززات الوان اوهرمونات للأصول لتجنب الإضرار بمستوي التخصيب.
(مكونات التغذيه الخاصه بتلوين الفلاور)
فيه وصفات كتير للخلطات الخاصه بالفلاور ولاكن انا افضل كل نوع اكل علي حدا وليست مخلوطه.
بمعني انا بحب انوع للسمك بتاعي وكمان محبش احط الإضافات علي الخلطه واركنها في الفريزر لانها بتفقد كثير من القيمه الغذائيه .
ومش كل الوان الفلاور بتحتاج نفس محفزات الألوان يعني مينفعش احط كلورو فيل بينك او الاستنازتين علي خلطه هديها لتاي سيلك او جولدن لانه هيقلب بتحسس منها واللون هيتحول للسواد او ستظهر الوان غير متناسقه ويبقي مشكله ولاكن هحتاجها للريد دراجون او اي سمكه فيها اللون الاحمر.
ودا اللي بيخلي كل لون منهم ليه احتياجات خاصه.
يعني اللون الاحمر ___كلوروفيل بينك.
اللون الازرق _____اسبرولينا.
اللون الاصفر _____صفار بيض+ذره صفراء مجروشه ناعمه وجزر وكركم.
وبتكون طريقه التغذيه كالآتي.
افرم قلوب بقري لوحدها.
افرم جمبري لواحدها.
افرم السبيط او الكليماري لواحدها.
افرم الفليه او التونه لوحدها.
وقسمهم علي قد الوجبات وشيلهم في الفريزر.
وحضر اضافاتك علي جنب .
ثوم بودر.
كلوروفيل بينك.
اسبرولينا.
فيتامينات بشريه.
ه سلينيوم بيطري مستورد.
كوسه +جزر+سبانخ+بزلاء+فلفل الوان.
بتسوي الخضروات دي علي بخار مياه وبعد كدا تفرمهم وتشلهم في علبه في الثلاجه.
وقت التغذيه هتنوع يوم جمبري يوم قلوب يوم فليه علي حسب مزاجك
وتجيب القلوب او الجمبري او الفليه وتحطه في طبق وتفك تجميده وبعدين هتضيف معلقه من الخضروات مع قليل من الثوم البودرة وقليل من محفزات الألوان .
مع الفيتامينات.
مره هتستخدم الكلوروفيل ومره الاسبرولينا بالتبادل
طبعا بتحدد المقادير علي حسب عدد الاسماك وحجمهم بمجرد التعود هتتقن المقادير.
ملحوظه الاسبرولينا مهمه لكل الألوان ولا يمكن الاستغناء عنها .
دا بخصوص الوجبه الاساسيه.
اما الوجبه الثانيه بتكون علف فلاور من نوع جيد جدا .
ويفضل التغذيه بكميات قليله في كل وجبه مع تعدد الوجبات علي مدار اليوم.
( الأمراض المنتشره وطريقه علاجها )
جميع الأمراض المنتشره يمكن علاجها زي جميع الأسماك الاخري زي النقط البيضاء او التأكل او الفطريات نفس طريقه العلاج اللي كلنا بنتبعها .
والنوع دا من الأسماك بيقاوم الأمراض دي بسهوله وبيتعافي منها بسرعه شديده بسبب قوه تحملها وجهازها المناعي القوي💪💪
اما اكتر مرض يصاب به الفلاور وهوه إنسداد الأمعاء او المشاكل المعوية وأعراضهم.
صيام السمك عن الاكل .
خروج إفرازات بيضاء في فضلات الاسماك علي شكل خيوط بيضاء طويله.
وفي الحالات المتأخر انتفاخ البطن ورقود السمكه علي ارضيه الحوض.
وعلاجه كألاتي.😷😷
استخدام دواء( كلير ) الخاص بالفلاور إن وجد طبعا وطريقه استخدامه يتم خلط محتوي الدواء المكون من قرص ابيض وقرص اصفر في ٢سم من الماء النظيف وسحبهم بسرنجه دواء .
وتقوم بإخراج السمكه المصابه من الماء ووضعها علي أي طاوله او مكان محكم وادخال السرنجه لابعد مدي تستطيع ادخلها في فم السمكه بعد كدا تبدء تفضي الخليط ببطء شديد حتي لا تتضرر باطن السمكه او الأمعاء.
البديل ليه لو مش متوفر نص قرص من الفلاجيل تطحنه كويس ويبقى مسحوق بودره +نصف كبسوله انتينال وتخلط محتوي الاتنين في ٢سم مياه وتديهم للسمكه بنفس الطريقه .
ودا فيه نفس الماده الفعاله للكلير.
وتكرر العلاج كل ٢٤ساعه مره.
مع تغير ثلث مياه الحوض بماء نظيف ومركون بنفس الطريقه السابقه .
يجب أن يخلط الدواء يوم بيوم قبل ميعاد الجرعه مباشرا حتي لا يفسد مفعوله.
مع رفع درجه الحراره ل٣٠ او ٣٢درجه مئوية.
لمده ٣أيام وبعدين ابدا التغذيه باكل خفيف زي العلف المخصص ليهم .
(التفريخ وطريقه الاهتمام بالبيض)
يتم تغذيه الزوج لمده شهر بالنظام الغذائي السابق مع وضع قطعه من السيراميك او الفخار المخصص ليهم مع وجود الفاصل بين الذكر والأنثى وعدم اضافه أي جرش او ديكورات بالحوض.
وتوضع قطعه السيراميك بالجزء الخاص بالانثي ومراقبه الفتحه التناسلية مع اقتراب وضع البيض ستلاحظ تغير مفاجئ في تصرفات وسلوك الزوج من اهتمام ومناوشات ورقصات وستقوم الانثي بتنظيف الفخاره او السراميكه بشكل متكرر ونزول الأنبوب الخاص بالبيض بشكل واضح حوالي ٤ او ٥ ملي.
في الوقت ده ارفع الفاصل وسيب الجوز مع بعض هيحصل هجوم مفاجئ من قبل الاثني علي الذكر وقد يقوم الذكر بمواجهه الانثي واجها لوجه وهيمسكو بعض من الفم و دا اختبار جداره بالنسبه للذكر ومن طقوس التزاوج وقد تستمر هذه المناوشات لمده ١٥ دقيقه بعد كده هتلاقي الدكر بداء ينضف الفخاره مع الاثني وهيكون عدائي جدا باتجاه أي حد يقرب من الحوض ويقوم بهجوم عنيف وقوي لو حاولت تدخل ايدك في الحوض يفضل في المرحله دي تلاشي أي ازعاج للجوز وتكتفي بالمراقبه من بعيد دون ازعاج حتي يشعر الزوج بالأمان والهدوء .😑
بأذن الله في خلال ساعات هتم عمليه البيض مع وقوف الاثني اعلي البيض للحفاظ علي تهويه جيده وحمايته من أي عوالق موجوده بالحوض كمان هتلاقي الدكر واقف في الحوض بعيد عن البيض يتولي حراسه الاثني.
يفضل بعد الانتهاء من عمليه البيض بساعه تقريبا نقل البيض لحوض آخر مجهز بماء نظيف ويفضل من نفس ماء الزوج اذا كانت جيده وبنفس درجه الحراره واضافه انتي فنجس قوي ومصدر هواء جيد واظلام الحوض تماما وعدم تعرضه لأي مصدر ضوء علشان الفنجس ميضربش البيض بالكامل .
من الطبيعي في أول ٢٤ ساعه هتلاقي نسبه من البيض تحولت للون الابيض ودا بيض فاسد او تمكن منه الفنجس متقلقش.
الباقي هيفقس بإذن الله .🖒
الزريعه.🐳
بعد الفقس هتبدء الزريعه بالتغذية علي كيس المح الخاص بيها لمده ٤ او ٥ أيام.
هتبدأ من اليوم ال٥ بعد الفقس السباحه الحره وتكون مجهز ارتيميا جيده الفقس وتبدا تغذيه الزريعه بمعدل ٥ او٦وجبات علي الاقل هتقسمهم علي مدار اليوم بمعدل وجبه كل ٤ ساعات تقريبا ولو تزود في الوجبات بيكون افضل علي حسب وقتك ومواعيد شغلك.
مع الاستمرار في التغذيه تبدء تجديد المياه للزريعه بدا من اليوم ٧ بعد الفقس بسحب الفضلات من حوض الزريعه وتعويض الماء باخر جديد ونظيف وبنفس درجه الحراره .
لازم تكون فاهم ان مرحله التغذيه علي الارتيميا مهمه جدا لانها بمثابه التأسيس من البدايه .
مثال .
علشان اقدر ابني برج من ٢٠ طابق لازم اعمل اساسات قويه تقدر تشيل البرج ده .
ودا اللي بتعمله مرحله الارتميا كل ماتهتم بيهم في الصغر تنتج اسماك قويه وسليمه تقدر تحافظ علي مناعتها بعد كدا وتكون قويه تجاه الأمراض.
بعد شهر من التغذيه علي الارتيميا هتبدأ تديهم دود حي ونظيف تماما لمده اسبوعين او تلاته لتسريع النمو.
( كيفيه فرز الزريعه من الصغر )
بعد ماتوصل معاك الزريعه لحجم عقله تقريبا وتعتمد بشكل أساسي علي الدود هتبدأ بالتدريج تديهم اكل فرش كما ذكرنا بالاعلي وانا بفضل أيديهم اكل فلاور يحتوي علي الكلوروفيل من الصغر لتحفيز الألوان وتنشيطها علشان اقدر ابين المواصفات اللي هتكون قويه.
ودا يعيبه بطئ النمو بس في المقابل هتقدر تحدد الزريعه اللي تستاهل تقتنيها واللي تقدر تستغني عنها.
ازاي اقدر أختار الزريعه اللي هتكون قويه من غير ماتكبر علشان اهتم بيها.
تختار الأسماك بمواصفات كالآتي.
1.بدايه نتوء الهيد اعلي الرأس بشكل طفيف.
2.ظهور اللاين او الخط العريض علي امتداد الجسم بالكامل ويكون ظاهر وبدون تقطع.
3.انتشار البيرل علي كامل الجسم والزعانف.
4.ظهور بقعه سودا علي جانب الرأس واضحه وغامقه.
5.تلون منطقه أسفل الرأس والخياشيم بلون الاصفر الاحمر الفاتح.
مرفق فيديولاسماك من تسميني من تفريخ مصري 100ب100
في عمر شهرين ونص تقريبا ومقاسها ٦الي ٧سم.
وفي النهايه دي تجربتي الشخصيه ورأي الخاص قد يختلف مع البعض أو يتفق مع البعض .😍😍
واتمني اكون قدرت افيد بمعلومه.❤
وان شاء الله لينا موضوع تاني يشمل طريقه تسمين الزريعه بشكل فردي وصولا لمستويات قويه .
وأسف علي الاطاله 🖒🖒
ليست هناك تعليقات:
إرسال تعليق
فضلا وليس امرا اترك تعليقا لتشجيعنا علي الاستمرار