هنتكلم النهارده عن تحفه فنيه ... نوع من أجمل أنواع البليكو وأكثرها تميزاً ... هنتكلم عن ال bristlenose pleco ... البريستول نوز أحد أفضل الخيارات الي قدام اي هاوي بيربي سمك مسالم عشان هيا مبتكبرش قوي زي البليكو العادي (أخرها 15 سم وممكن في بعض الانواع تبقي اصغر من كده كمان) .. موطنها الاصلي أمريكا الجنوبيه وتحديداً حوض الامازون .. سمكه مسالمه وهاديه جداً لكن ممكن تدافع عن منطقه نفوذها ضد انواع بليكو تانيه ... تربيتها سهله مش صعبه نهائي وبتتحمل درجه حراره من 20 ل 27 و PH من 6 - 8
البريستل نوز بتعيش من 3 - 4 سنين طبقاً لمدي أحترافيه الهاوي وقدرته علي تغذيتها بالعناصر الي بتحتاجها كلها ... سمكه بتتغذي علي الطحالب وفي حاله نفاذ الطحالب من الحوض ممكن الهاوي يقدملها خضروات زي الخيار او الكوسه وهي هتاكل منهم مفيش أي مشاكل .... البريستول نوز سمكه مصنفه انها من السمك الغالي بره .. عشان في إقبال عليها خصوصا مربيين الديسكس عشان هيا مبتكبرش وبالتالي مش هتأذي السمك وشكلها مميز وتعتبر إضافه للحوض المسالم في كل الاحوال بشكل مقدمه رأسها الغريبه سبحان الله ... نرجع أنها وصلت لأسعار ممتازه في مصر بالفضل لله ثم للحج Abdallah Gabr أحد أشهر مفرخين السمكه دي في مصر ثم الفضل للتجار الي بيحاولوا يقدمولنا السمك بأسعار ممتازه تخلي الهاوي يقتني اي سمكه مهما كانت نادره ...
هنتكلم عن التفريخ :
البريستول نوز من السمك سهل التفريخ ... التفرقه بين الذكر والانثي سهله وبتبان عن طريق شكل مقدمه الرأس ... الذكر شكل مقدمه الرأس كبيره ومليانه قورن وبتبقي متركزه في وسط الرأس عكس الانثي بتبقي أصغر ومعظم القرون موجوده حوالين الفم
هتحتاج سمكتين تكون متأكد أنهم زوج من الفروقات الي قولنا عليها وتكون مدخلهم فتره أعداد مسبقه بأنك تأكلهم Blood Worm أو أي أكل نسبه البروتين فيه عاليه وطبعاً أقراص أسبرولينا ... يفضل ديكور يبقي علي شكل كهوف عشان يسهل عمليه التزاوج ... الذكر هيختار كهف وهيبتدي ينضفه ويستني الانثي ... الانثي بتتفقد الكهف ولو عجبها بيبداء التزاوج ... الانثي بتحط البيض والذكر يلقحه ويطردها من الكهف ويفضل حارس البيض ... ممكن في أثناء الحراسه تيجي أنثي تانيه وتبيض برضو مع البيض القديم والدكر يلقح البيض ويطردها ويحرس البيض وهكذا ... الانثي بتبيض من 50 ل 100 بيضه .. البيض بيفقس في فتره من 4 - 10 ايام .. الذكر بيفضل حارس السمك الصغير لحد مايتغذي علي كيس المح كامل ويبتدي يتسلق الكهف ويخرج ... الذكر بيفضل صايم طو فتره الحراسه عشان كده لازم تأكله كويس قبل فتره التزاوج .... بالنسبه لأطعام الصغيرين ... بتبداء تديهم مسحوق أسبرولينا وبعد كام يوم تقدر تأكلهم أرتيميا عادي وأي نوع طحالب موجود هيتغذوا عليه .
ليست هناك تعليقات:
إرسال تعليق
فضلا وليس امرا اترك تعليقا لتشجيعنا علي الاستمرار