بسم الله الرحمن الرحيم
- موضوع شامل عن سمكة الأنجل.
اولاً طبيعة السمكة من حيث البيئة الطبيعية و الـ من الافضل تقريبها في الحوض الخاص بيك.
1-الانجل من فصيلة السيكليد الامريكي الـ بينتمي لنفس الفصيلة سمكة الاوسكار و سمكة الديسكاس و تعتبر من عائلة البلطيات.
2-افضل تجهيز للحوض انه لا يقل عن 100 لتر و يكون بنظام فلترة ممتازة بالنسبة لحجم الحوض ، يُفضل درجة الحرارة من 26 لـ 29 ، تجهيز النباتات من الاحسن يكون نبات ورقه عريض حتي فيما بعد يتم إستغلاله كمكان لوضع البيض.
3-الغذاء : سمكة الانجل من الاسماك البروتينية جداً و يُفضل وجبة حية يومياً ليها علشان تلاحظ النمو الجيد و الالوان الزاهية و الوجبات الحية زي ارتيميا، ديدان الدم او التوبيفكس، الدافينا ، و ممكن صغار الدود القبابي الميل ورم في بداية الانتاج لإن نسبة البروتين فيه عالية ، ولازم طعام حي لأن ممكن السمكة تدخل فصيام لحد الموت بسبب عدم وجود بروتين كافي فالأكل و عدم توفر طعام حي.
4-الانجل من الاسماك الحساسة جداً للأمراض والتغيير في كيمياء المياه ، علشان كدة لازم تحافظ علي جودة مياه الحوض ، و علي درجة الحرارة بالخصوص وقت التغير الجزئي للمياه ، تغيير الماية مهم جداً للسمكة علي الاقل بنسبة 25% من الماية كل اسبوع، المحافظة علي عدم وجود تيارات قوية فالحوض مع نسبة اكسجين كويسة لتنفس السمكة.
#التفريخ:
الانجل من الاسماك الـ بتختار بعضهم وقت التفريخ و من النادر جداً انك تلاقي زوج متوافق فرض عليه.
من الافضل انك تحط مجموعة لا تقل عن 6 اسماك بالغة ، ممكن يطلع منهم جوزين متوافقين علي الاقل.
-بتلاحظ التوافق في الحوض عن طريق ان الجوز بيختار ركن فالحوض و في الغالب بيكون الركن المزروع و بيبدء في عملية محاربة الاسماك التاني و إبعادھا عن المكان الـ يختاروه و احسن حل هنا انك تشيل الزوج المتوافق في حوض منعزل للتفريخ بمساحة لا تقل 40سم للحوض.
#تجھيز_التفريخ:
وضع نبتة ورقتها عريضة و كبيرة و تكون خضراء اللون مثل الانوبيس و الامازون ، او شراء مساطر تفريخ مخصصة للأنجل من المحلات بتكون عبارة عن قطعة بلاسيكية خضراء بيتم تعليقها علي الزجاج ، و وضع فلتر سفنج فقط لأن الباور هيد مينفعش تماماً.
و انا عن نفسي بس متقولوش لحد بفرخ علي الفاصل البلاستيك بتاع الحضانة للسمك الولود 😂❤
-الزوج بيبدء بتعقيم المكان الـ اختاروه للتفريخ و بتظهر فالوقت دا انبوبة تحت الزعنفة السفلية و دي فالنتاية ابوبة البيض و فالذكر انبوب التخصيب ، بيتم وضع البيض و تخصيبه و حمايته من الزوج و تنظيفه من البيض الفاسد او اي شئ عليه و تهويته إلي ان يفقس بعد يومين لـ 3 ايام.
-من الضروري وقت التفريخ وضع دواء للفطريات مثل الفورمالين او الميثيلين بلو او ادوية جاهزة لأن البيض مؤكد بيصيبه الفطريات و البكتيريا و بتسبب تلفه لو متمش وضع الدواء.
-البيض الطبيعي لونه شفاف حتي مرحلك الفقس بيلدء يغمق شئ بسيط لدرجة البنية و الفاسد بيكون لونه ابيض و من الافضل عزله لحماية البيض السليم من الطبقة الشفافة و بتكون عبارة عن عفن او فطريات.
-عدد البيض بيرجع لعمر الزوج و حجمه ، في الغالب من 100 لـ 300 بيضة
#الإهتمام_بالفروخ.
البيض بالكامل بيكون فقس خلال 3 ايام من وضعه و بتلاحظ حركة الفروخ علي النبات او المسطرة.
-بيبدء العوم الحر فالحوض بعد حوالي اسبوع.
-التغذية بتكون في اليوم ال خامس من الفقس و بيتم تأكيل الارتيميا بمعدل 4 وجبات فاليوم إلي عمر شهر بيبدء تأكيل الدود المقطع و بتبدء مرحلة التسمين للسمكة.
- تغير ربع الماية بعد 15 يوم من الفقس علي الاقل و المحافظة علي درجات الحرارة.
-تأكيل الارتيميا حاول متضيفش مياه فقس الارتيميا للحوض علشان حيتراكم الملوحة و ممكن تؤدي لموت الاسماك كلها.
ملحوظة مهمة:
الزوج المتوافق من الافضل انك تشيله بعد وضع البيض مباشرة لأن كل زوج و ليه طبع ، ممكن زوج ياكل البيض و العش كله و زوج يهتم بالفروخ حتي بعد مرحلة الفقس و دا طبعاً مخاطرة و شئ غير مضمون بالنسبة للعش.
-لو الزوج بالصدفة لقيته بايض فالحوض العادي تشيل الورقة ال عليها العش بشرط عدم تعريضها للهواء تماماً و وضعها في حوض بنفس المواصفات ال ذكرتها و معاهم اكسجين.
اتمني الموضوع يكون مفيد و يكون مفهوم بالنسبة ليك. ❤
ليست هناك تعليقات:
إرسال تعليق
فضلا وليس امرا اترك تعليقا لتشجيعنا علي الاستمرار